Google Pixel 6 & Pixel 6 XL: გამოსვლის თარიღი და ტექნიკური მახასიათებლები

Android მომხმარებელი განსაკუთრებულად ელოდება Google-ის ახალ ფლაგმანურ სმარტფონებს. ჩვენ უკვე დაახლოებით ვიცით რას უნდა ველოდოთ, მაგრამ ამ პოსტში ყველაფერს ერთად თავს მოვუყრი და გაგაცნობთ მნიშვნელოვან სიახლეებს.

დასაწყისისთვის გამოსვლის თარიღზე გეტყვით და ის ტრადიციულად ოქტომბერში იქნება. Google-ის ყოველი ახალი ფლაგმანური სმარტფონი გამოდის ოქტომბრის შუა რიცხვებში. შესაბამიდან 10 ოქტომბრიდან 20 ოქტომბრამდე უნდა ველოდოთ გამოსვლას. კონკრეტულ გამოსვლის დღეს ძალიან მალე გავიგებთ.

Google-ისთვის წელს მნიშვნელოვანი პერიოდია, რადგან პირველად უშვებს რეალურ ფლაგმანურ სმარტფონებს, რომლებიც კონკურენციაში იქნება სხვა ბრენდის ფლაგმანებთან. განსაკუთრებით პირდაპირი კონკურენტი იქნება Apple-ის ახალი თაობის iPhone-ებთან.

სანამ ფლაგმანურ მოდელზე გადავალთ, სტანდარტული მოდელის შესახებ გეტყვით, რომ Pixel 6-ის შემადგენლობაში 6.4 დიუმიანი ეკრანი იქნება წარმოდგენილი, რომელიც შედარებით ბიუჯეტური მახასიათებლებით გამოჩნდება ბაზარზე, შესაბამისად ფასიც მისაღები ექნება. Pixel 6-ს ასევე არ ექნება პერისკოპული კამერა და არ განახლდება წინა კამერა, ის კვლავ 8 მეგაპიქსელიანი იქნება.

Pixel 6 XL-ის შემადგენლობაში 6.7 დიუმიანი QHD რეზოლუციის OLED ეკრანი იქნება წარმოდგენილი 120 ჰერცი სიხშირით და Edge დიზაინით, რაც გულისხმობს გადახრილ/გადაზნექილ გვერდებს.

წელს პირველად Google-ის სმარტფონებზე წარმოდგენილი იქნება თავად Google-ის დამზადებული 5 ნანომეტრი არქიტექტურის მქონე ჩიფსეტი, რაც ნიშნავს იმას, რომ ისედაც საუკეთესო სისტემის მქონე Pixel-ი კიდევ უფრო მოქნილი და ოპტიმიზირებული იქნება. Google-ის ოპერაციული სისტემა Google-ის პროცესორზე მოგვაგონებს Apple-ის ვარიანტს! ეს უკანასკნელი საკუთარი სმარტფონებისთვის თავად ქმნის ჩიფსეტებს. Google-ი ისედაც იყო Apple-ის პირდაპირი კონკურენტი, ახლა კი სტატუსი გაიმყარა.

მნიშვნელოვან სიახლეებს ველოდებით კამერებშიც. Google-ი ფაქტობრივად გასული 4 წლის განმავლობაში არ ცვლიდა კამერის სენსორს, თუმცა მაინც საუკეთესო გადაღება ჰქონდა და დიდ კონკურენციას უწევდა ბევრად ძვირიან და ტექნიკურად უფრო მძლავრ სმარტფონებს. ამჯერად მთავარი კამერა 12 მეგაპიქსელიანის ნაცვლად იქნება 50 მეგაპიქსელიანი, რომელსაც ტრადიციულად Sony დაუმზადებს, თუმცა ამჯერად როგორც ვიცით ექსკლუზიურად Google-ისთვის განკუთვნილი სენსორი იქნება. ულტრა-ფართო კამერის მახასიათებლებში გადაინაცვლებს 12 მეგაპიქსელიანი სენსორი, რომელსაც მთავარი კამერის მსგავსად DualPixel ტექნოლოგიის ავტოფოკუსი ექნება. XL ვერსიას ასევე ექნება 5X პერისკოპული 48 მეგაპიქსელიანი კამერა. წინა კამერა 12 მეგაპიქსელიანი იქნება 4K ვიდეო გადაღების მხარდაჭერით.

სხვა ტექნიკური მახასათებლებიდან აღსაღნიშნავი იქნება 5000 მილიამპერიანი ბატარეა, 12 გიგაბაიტიანი ოპერატიული მეხსიერება და Android 12 ოპერაციული სისტემა ექსკლუზიური ინოვაციური ფუნქციებით.

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *